Un documental CON Beiras
“A miña cabeza é Isabel”, dixo Beiras no Parlamento de Galicia. Isabel foi súa man dereita, a súa cómplice, a secretaria que o acompañou dende a facultade ata o Parlamento. Reunidos de novo no lugar no que tantas horas pasaron, os dous lembran todo o periplo que viviron xuntos, afondando na dimensión de Beiras como parlamentario.
Hoxe traémosvos unha boa nova. A longametraxe Beiras.Vivir2Veces está máis preto de ver a luz.
O día 2 de setembro farase unha pre-estrea da película no Festival de Cans, na que amosaremos as primeiras imaxes deste documental que tantas persoas fixeron posible.
Pouco tempo despois faremos a estrea oficial da película en Compostela. A ela estarán convidados os mecenas que participaron na campaña de crowdfunding coa recompensa que inclúe o convite á estrea.
Axiña anunciaremos a data exacta da estrea oficial.
26 / 05 / 2021
Dende que a web de Beiras.Vivir2Veces abriu, xa están dispoñibles para os mecenas as primeiras pezas do webdoc.
Beiras.Vivir2Veces é un proxecto no que queremos contar a Beiras dende tres ángulos: lugares, fotos e conversas. Esas son as tres categorías nas que organizamos as pezas.
Empezamos subindo a conversa de Xosé Manuel Beiras con Xosé Luis Méndez Ferrín e seguimos coa conversa con Rosa Regueiro, profesora da facultade de Económicas e os seus alumnos, na que Beiras repasou a súa etapa como docente e a súa visión da economía.
Estreamos a sección de lugares cunha peza sobre París, na que Beiras fai un repaso da capital francesa e dos distintos París que el viviu: o do descubrimento do mundo, o dos anos sesenta e o dunha segunda vida, nos oitenta.
A nova peza que subimos é a conversa con Manoel Santos, militante ecoloxista, altermundista e coordinador de Greenpeace en Galicia. Nesta ocasión, ambos comparten as súas ideas. Conversan sobre o futuro, sobre a ecoloxía, o altermundismo e sobre outros mundos posibles.
Estes contidos están dispoñibles para os mecenas na sección de Acceso. Próximamente abriremos a posibilidade de mercar acceso ao público xeral. Se tes calquera problema ao acceder, contacta connosco en info@vivir2veces.com.
Beiras regresa a un espazo clave na súa vida: un aula da Facultade de Económicas. Xunto coa profesora Rosa Regueiro, repasa a súa visión da Economía e a súa experiencia coma docente.